Sep ding thute:
- Cidamna kisitna nei zeel in: Sunglam pualam leh naupang cidamna bang ciang hiam cih a hun zui in ki sit zeel in.
- Folic Acid kicing tak in ne den in: Nisim in Folic Acid akici naupaite’ zatui 0.4 mg sang a tawm zawlo nek det sawm in.
- Naupai tung anek ding zatuite ne hamtangh in: A sawtlo in mi hong piang ding nauneu a ding in vitamin kicing tak in a nek kei leh thazawm in, suak hak, a nu gim, nau nak zolo cih om thei ahih man in vitamin kicing takin ne den in.
- Protein a tam thei thei ne in: Naupaai nupi khat in nisim in nek loh phamawh ptotein pen 75 grams pan 100 grams kikal ahi hi. Naupang’ khuak a hoih na ding in protein kicing tak in nek kul hi.
- Exercise a tam thei thei bawl in: Exercise bawlna hang in natna tuamtuam bei in, nausuah zong baih zaw deuh thei ahih man in cidamna ding in exercise bawl ding thupi hi.
- Thu hoih ngaihsun in, la hoih ngai in: A nu lungnuam leh, gilsung a om nau zong a nun nuam ahih man in thu hoihlo leh la khauhpai zuazua sang in, aw dam leh guitar ging sel sel khong nau i khuak a ding leh lungsim cidamna ding in hoih hi.
- Naupai kawm sa in Khualzin kidawm in: Khualzinna leh gamvakna ding a om leh kidawm mahmah in.
- Natna pian dang na neih leh Siavuante tung ah gen in: Na innkuan, nap u, na pi, na nu leh pa, na khang gui zui in natna kizui na neih leh na siavuante tung ah gen in. Gtn. diabetes, herpes ( STDs), lungtang natna, sikhang, zunkhum cih dan a tuamtuam.
- Za tep kei inla, zatep te gei ah zong om kei in: Za tep ahih kei leh, zakhu tawh nupi naupai khat aki nai in a om khak leh tua nau hong suak ciang in tolh, a hun cing ma in suak, pong cinglo, mi banglo cihte piang thei hi.
- Kham theih guih theite zang kei in: Zu leh Beer in nau hong suah ciang in mi banglo, pong cinglo, ahih kei leh pong tamlua cih bang ahi zong in, a ci a sa, a maitang tung mahmah ah naungek ngei bang lo deuh in pianzia tuam leh zun painate a ngei banglo thei hi.
- Zatui zaha upmawh nek ken: Nau neih lam a thei Siavuan khat in nein hong cih zatui leh zahate bek nek sawm in. Pong cinglo, ngaihsutna kicing lo, khuamuhna sianglo, lungtang kisai dan manlo cih te a kipan maitang ah mutheih tumdang om thei hi.
- Sa ngawi/ Hotdog ne kei in: Hot dog/ sangawi pen naupang te in a nek luat ding hoihlo hi. Akimuh khiatna ah nipi kalkhat in khat vei sang a tamzaw a ne naupangte a ding in cancer om baih zaw cih kimu khia ahih man in nupi gaite in zong ne keileh hoih zaw hi.
- Niangtui leh coffee nek loh sawm zaw in: Niangtui leh coffee kham tek a nek loh ding pen, gil sung a om naupang a ding in hoih zaw hi. Nekloh phamawh hun a om leh zong kham piikpeek dong nek sawm kei in.
- Ngasa nekloh sawm zaw in: Naupai lai tak in ngasa nekloh hoih zaw hi. Tam nekna in nauapang’ khuak a hoih ding zah in hoih sak lo thei hi. Sa minlo phalo, sa am (barbecue) te te nekloh sawm zaw in.
- Lamgei a ann leh meh kizuakte ne kei in: Lam gei a kizuak nek theih, nek mawh te neleng gilvah pak ziau na pi in, vitamin a ding ngaihsutna tawh kizuak hi masalo ahih man in natna tuamtuam hong lut baih hi.
- X-Rays kizaih kei zaw in: Ahih theih lai teng X-Rays ki zaih loh ding sawm hi. Ahi nau suah khit ngak theih ding natna ahhi leh ngak ding hoih zaw tham hi.
- Microwaves zang kei inla, a gei ah zong nek kha kei in: Thakhat thu in an satlum suahna van microwaves zang kei in la, a gei ah zong nek lua kei in. Gilsung a om nau neu i khantohna ding nawngkai thei hi.
- Lung noploh luatna, lunggimna ding thu pel in: Lungkhamna, hehna leh buai luatna a om loh na ding in kidawm in. Gilsung a om naupang a ding in hoih lo hi.
- Huih siang tholo leh a namtui luate pel in: Innza, namgimtui, huih namtui (perfume) leh a namsia luate pel hi.
- Na ci a sat loh na ding I kidalkhol in: Na pumpi 102 degree sang in a sat zawk leh naupang a ding in lauhuai ahih man in cidamna hoih tak in kikem siam in. Tuisa tawh zong kisil loh ding hanciam zaw in. Khut leh khe tang sak in cidamna ding (exercise) bawl zeel in.
A tung a laite “What to Expect When You're Expecting” cih laibu sung pan a article ki kaikhawmte sung pan aki lakhia sawn hi.
