Zomi kipawlna makaiding icihte in...

A picing kipawlna/ sepkhopna khatpeuh a kician in a om suak theih na ding in System hoih kisam mahmah takpi hi. Tua system a om theih na ding in Policy kisam masa hi.

Policy a om theih na ding in Policy maker kisam leuleu hi.

Zomi khantohna ding leh, Zomi a ding a it kihi tek, a vei kihi tek hi mah ta leh thatang lian leh kampau bek tawh ahih theihlohna mun pen "policy maker" cihte dinmun ahi hi.

Tua a ding in policy maker te pen Sinna, Simna, Siamna, Sepna a om zeklo in hong bawl theilo leuleu hi. Tua munsan lian ah tu laitak a i lunggulh a i gengen Zomi sung ah mipil, misiam icihte tuadinmun ah hong kikhung theih ding uh i ki tangsapna ahi lian hi.

Makai khat gen siat ding haksa lo hi.
Pilna theih kul selo, siamna neih kulselo, sinna omkulselo hi.
Ahih hang in tua i gensiatpa/nu dinmun i tunna ding pen baih tuanlo veve cih dan khat in om gige thei hi.

Gtn.

-Lai Siangtho sang nipi kal khat bek a kah ngeilo khat in Lai Siangtho sia hong sem leh...
-Pasian' thuthuk sinna a nei ngei kikeuhlo khat in Biakna kipawlnapi hong makaih leh...
-Computer a sin ngeingiatlo khat in computer sia hong sem gawp leh...
-Music tawh kisai asin ngeilo, a kah ngeilo khat in music sang ah hong hilh leh...
-Mawtaw hawl ngeilo leh a sin ngeilo khat in, mawtaw tawh tawh mawtaw hawl ding in hong kithawi leh...

A piangna ciang om ding a, zong hong piang leh pahtak huai mahmah ding hi.

Ahih hang in International level Kipawlna ding ah-

-A sinnna mah om zek leh...
-A siamna mah om zek leh...
-A sepna mah om zek leh...
-A simna mah om zek leh...

Cih pen mi picingte kalsuan zia ahih man in "perfectionist" ihih zenzen loh hang in survival level ciang leh sustainable level ciang tawh i khantoh na ding zong system leh foundation hoih kisam a, tua ding in policy maker kisam in, tua ding in a tung a i gen teng akisam masa hong hi zeel hi.

Zomi sung ah i kitangsap tam mahmah a, i sep masak ding leh sep nihna ding leh a ban bang a zop toh toh ding tampi om hi.

I sep nihna ding thute tawh i buai masak kahk loh na ding leh, i sep masak ding akitangsamte i manghilh loh na ding thupi a, tua hi peuh leh a nung ah kuakua in a zui zong in hong hoih toto ding hi. Lampi hoih akisial suak a om nak leh, tua lampi zui toto peuh leh a nungsang ah kuakua in hong makai zong in hong lem toto lel ding hi.

Zomi te khantoh na ding i kikupte thupi a, zop toh zeel lai ding ahi hi.

Lungdam.

Tg. Sianpu

Born a Zomi, die a Zomi: Critical analysis and modern approach

Zomi in kapiang, Zomi in kasi ding: Khangthak ngaihsutna leh Sanzia pawlkhat tel-etkaksakna

Leitung gam tuamtuam, minam, tuamtuamte’ lak ah “lengla leh inntek” cih I ki lamdan zia leh a sep theih zah uh aikibang loh lam I theihsa ciat ahi hi. Gam zawngnate leh gam khangtona a tawm lai gammite in gam khangtona munte ah nasep, silbawl zong in, pilna kisin/ sin ding kin hanciam ciat hi. Mi khat in a sep thaman akingah kimna mun leh gamte ki manawh ciat hi. Tua khuhun paizia tawh kizui in Zomi te zong mun khat pan a dang mun khat, gam khat pan a gamdang mun khat ah I kikhin liailiai ciat hi.

Zomite zong hong bawlpa Pasian’ thupha tawh gam khangto nate ah a zuang, nasep silbawl leh pilna siamna sin tampi tak kiom ta hi. Mailam hun ah a tam zaw thawm hong kibehlap toto lai ding a, Zomi tampi tak in a hanciam san laitak ahi hi. Asia sung ah Zomi nasem leh siamsin tampi a omna Singapore, Japan, Malaysia, Korea cihte leh America, UK, Australia cih a kipan gam khangtonate Zomi te in kidelh ziahziah hi.

Zomite omna gam khangto te ah nasem leh siamsin a tam zaw pen lengla dan mah kihi lai a, inntek mun taktak a ngah ki tawm lai hi. Gam khat ah gami khat I ngah theihna, sep theihna leh peemta, galtai, lengla khat I septheihna kikhai mahmah veve lai hi. Net leh sat hun ciang in sum bei zah, pilna sinna ah suahtak theihna leh sum bei zah pen peemta leh inntek gammite’ a tawh ki khai mahmah ahih man in Zomi nasem, sangkahte in a omna gam ciat uh ah a inntek theih theih na ding in aki hanciam ciat ahi hi.

Asia gam sung ah Singapore bang en pak leng: nasem veve, WP (Work Permit), S-Pass, EP (Employment Pass), PR (Permanent Resident) leh Gammisuahna (Citizen) a nei cih bang in ki khen diudeu hi. WP visa tawh a om a nasem khat leh PR khat I septheihna, ngah theihna leh suahtakna kibang lo a, PR khat leh gammi a suak khat I hamphatna zong kikhai lai veve hi.

Zomi-te bang zah hiam khat gami a suahna America gam en leng zong, visa nei tampi lak ah Zomi-te a tamzaw phial bang ahi ding galtai pemta hihna (refugee), green card tawi khat, PR cih leh American citizen cih dan in a om to leuleu hi. Hamphatna leh septheihna pen ki lamdang to pah diudeu hi. Tua ahih man in Zomi-te in nuntak haksatna leh nuntak gimnam zaw ding in i omomna gamte ciat ah a intek theithei ihih na ding ki hanciam hi. Koi gam koi gam ah PR leh Citizen (gammi) ngah ding baih pah khinlo a, a ngahte zong hampha kisa in minam bup ai bang in ki tuat liang in ki lungdam pih mahmah hi. Biakpiak lungdam kohna nei in, lawm in pawi a bawl zong ki om hi.

Zomi-te in gam khat ah khantawn omtheihna (PR) nam khat peuh ahih kei leh gammi suahna ngah theihna ding aki hanciam san laitak in, tu a bang suah theihna ding a ngah gige, siauh theihna, ngah theihna nei napi in gami a suaklo, PR ngah thei napi in a lalo ki tawm mahmah kha ding hi. A ngah nailote zong baihlam tak in hong kipia ziau hi leh a lalo ding ki tawm mahmah ding hi. Tua bang kawmkal ah PR leh Gammisuahna a lalo pen ki tawm mahmah a, ngah thei napi in a lalo tangial pen a tawm mahmah ban ah, tua a lalote in zong “Zomi ka it luat man in a lalo hi ingh…” aci mi bang zah ki om ding hiam cih ngaihsut ding thu khat ahi hi. Tua ahih man in khuano, khuata pan in zang gam, khuapi te leh gam khangtonate ah ki khin litlit in, ki tuah litlit cih pen Zomi te bek hilo in “leitung paizia (global trend)” khat ahi gige hi.

Hih bang a leitung paizia pi khat tawh kizui in aki khin litlit Zomi-te in hanciamna tuamtuam I neih laitak in I ngaihsut ding thu khat ah, “Zomi in ka piang, Zomi in kasi ding…” cih thu ahi hi. Zomi khanglui leh khangthak pawlkhat (a tam zaw ahi kei leh zong hon khatte in) a tung a kammal pen “namdang zi/ nam dang pasal (kahbia)” cih bekmah a mitkha ah om pah velvel leh kilawm hi.

Hih laphuakpa in a la phuak lai in namdang tawh kigawmna thu, mun dang, tual dang khat ah luang phumna thu khong ngaihsun zong hi thei kha ding hi. Hih kammal pen laphuakpa a bek dan in ki zang nawnlo in, mipi/ Zomi namte’ khangthak paunak dan in akizang kim ciat hi ci leng zong kikhial khollo ding hi. A tung a Zomi in ka piang, Zomi in kasi cih kammal pen “global trent” tawh khantohna lam a masuan Zomi khangthak te in I lungngaih kik ding kisam leh kilawm dan in om hi. Zomi-te’ gamdang paikhiatna, nasep silbawlna leh pilna sinna te ban ah I omna I gammi suahna cih thute tawh etkak huai kha leh kilawm hi. Laphuak pa, hih lai a gelhpa mahmah ahi a, hih lai a simkha mipi akuamah peuh a tamzaw pen Zomi in a piang kha a, Zogam ah a piang kha te hi ding hi. Bang hang in “a piangkha” cih kammal zang ihiam cih leh “I pianna ding pen eima teel theih zong hilo a, ei suahma pek in a teel thei I nu leh pate nuntakzia tuamtuam hang in a ki piangkha ahih man hi.” Tulai khangthak Zomi-te lak ah “Zomi in a piang, Zogam pan a piang…” acithei ding ki tam nawn hetlo ding a, hong tawm tektek ding ahi lai hi. Bang hang hiam cih leh a nu leh a pa, a pi leh a pu ahi ding ei teng mah in gam khangto nate ah a inntek theithei ding in, kikhin, tai in ki hanciam tek ahih man hi.

I hanciam bang ciat hi henla, I thungetnate Pasian in hong dawng takpi henla, I lunggulh thute hong tangtung takpi bang hi leh PR/Green card bek hilo in Gammisuakna a la/ angah hi le hang khangthak Zomi te in “Zomi in ka si ding…” cih pen amau tawh hong ki gamla tektek ta ding uh hi. Tangthudan khat (legend) dan in a om ding tawh kibang leh kilawm hi. Tua hi leh “Zomi in ka piang…” aci thei lai uh diam?

Gtn. America gammi suaksa Zomi nupa sug pan in hong piang thak Zomi naungek in “Zomi in ka piang…” cih ciang na tawm a gen ding a baih lai diam? I suahna leh I pian zia ding tel theih hilo icih zah khat in gamminam suahna vai ah sih dan ding pen eima tel theih zong hi veve bilbel hi. Zogam pan pemta, gamdang khat ah gammi suahna anei khin hat a sih ciang in “Zomi in ka piang, Zomi in kasi…” akici thei veve diam? Tu hun ciang in Zomi te zong kumkhat khit kum khat, gamdang ah a tai leh a pai ki behlap ziahziah mai hi. A diakdiak in Malaysia lam tawn in a lom lom in ki pai ziahziah mai hi. Mimal a tamna dung zui in gam khangtonate ah gammi suak zong ki behlap toto veve hi. Gammi suak Zomi te asih uh ciang in “Zomi in kasi…” ici lai veve diam? Tuate sung pan hong khang thak Zomi vontawi te “Zomi in ka piang, Zomi in kasi ding…” hong ci lai uh diam?

Zomi cih pen gammisuahna hio in, minam min hi aci om kha ding hi hangh. Ahih hang in Zomi lak ah “Chin” cih a deiksa leh a kibulh zong a hunk hop khat mah kiom ding hi. Tuate a ding in ahih leh bel “Chin lu mui bi, Chin lu tae dae…” cih dan pian in “Chin in ka suak a, Chin in kasi ding…” acih a kul ding dan ahi hiam? Zomi nu leh pa sung pan suak ahi phial zong in Zopau a theih kei leh bel “Zomi in ka piang, Zomi in kasi ding…” bel ci theilo kha thei ding hi. Tua bang dan dinmun khangthakte pen Zomi te omna gam dang gen loh Kawlgam sung natawm ah tam simsim ki om mai ta kha ding hi.

Tualo Kawlgam sung a om leh a suak Zomite in a ID/Innkuan laibu sung khong ah “Chin” mah nakici velval ding uh ahih man in Zomi tate hi mah ta leh “Zomi in ka piang, Zomi in kasi” acih thei takpi mah uh diam? Chin in ka piang Chin mah in hong kisam, Chin mah kakici, Chin mah tawh kasi ding cih ahi zaw mai ding hiam? Kawlgam sung bek ah zong mun khangto zaw deuhna leh khuapi zawdeuh leh mite pau siam Zomi te khangthak sung ah hih dan thu leh la te a tawm a tam om kiaukiau ta ahih man in Zomi cih kamal, laimal lian pen muh ding kikhat mahmah veve ta hi.

Tu aahih leh Zomi icih pen gammi suahna zong hi kei, pau zong hi kei, sisan hi zaw hi ici hiam? Sisan tawh kisai Zomi lak ah nasepna a nei kipawlna khat in ZYA ahi hi. Hih Zomi khangote in a sisan uh akisapna munmun, Zomite bek ci tentan tuanlo in Kawlmi leh namdang te deidanna omlo in piakhia uh hi. Zomi ahilo, namdangte khat tung ah Zomi khat I isan akihel a leh tua namdangpa sung a Namdang ahih na akiam tuan hiam? Asi kihel khin hi ve. Akahbia hi ven? Tua Zomi pa in e leh a si a kiam tuan ahih ciang Zomi ahihna a bei tuam diam? Tua namdang pa e leh Zomi si tawh a nungta ahih man in a sung ah Zomi sisan om ahih ciang Zomi ici thei diam? Zomi sisan kisam mahmah khat in namdang khat I si (zato ah a om bang bang khat peuh) a lak man in tua Zomi nu/pa Zomi ahihna a kiam tuan hiam? Bang hang hiam? Tua Zomi I sisan asit nawn diam? Sit icih bang tawh I the diam?

Zomi ihihna pen I gammi suahna zong hi kei, I minam kamapu zong hi kei, tu laitak a I sisan neihna zong hi kei, I pianpih, I pian tung pan a om sisan tung pan in ki khensat hi ici kha hiam leh? 100% Zomi sisan aneilo khat Zomi hi kei or Zomi a tuh/ kahbia hi ici hiam? 100% leh 80% ah minam ahihna aki lamdanna bang ahi diam? Percentage bangcih kiteh ding ahi hiam?

Leitung khantohna tawh kizui in Zomi-te zong I khantohna ciang om veve a, tua khantohna tawh kizui in siatna lam zong tuma kum 2000 (Lai Siangtho sung a om paw khat dan mah in) ki behlap toto hi. Zomi khangthak lia leh taang te pawl khat sung ah cihtakna kiam in hoihlohna in a zawh khak mi tampi ki om khinta hi. A diakdiak in pre-marital sex, acih uh kitenma a lupkhopna, living-together acih uh nupa hilo napi a om khopna, nu leh pa omkhopna a tuamtuam leh zatui sutna pan ah a, nat leh satna pan kilawh sisan kizopna, natna ki lawhna a tuamtuam tam tektek ta hi. Numei khat ahih kei leh pasal khat in a tung a sisan kihopna zia khat peuhpeuh nei kha leh tua nu, tuapa in zi/pasal leh ta nei in a om ciang in sisan kibanglo (namdang khat ahih leh) tuanu, tuapa I sisan siang lai hi ici thei diam? 100% hi nawnlo ahih manin a tate (kahbia/ kigawm) ici thei diam? Minam ahihna koi tak lian hi ding hiam? Tua bang tea hi a, Zomi sisan a dim phitphet (tui hetlloh) akici te khat in zong Zomi in suak mah taleh gamkhangto khat a tun ciang in gammi suahna a lak leh tua nu/tuapa I minam hihna koi lian hi ding hiam? “Zomi in ka piang, Zomi in kasi ding…” aci thei lai veve diam?

Lai Siangtho sung ah a mai a om suangmanpha I manphatna a tello vok/ ganhing leh mihai/mi gilote gentehna in a neihna mun om hi. Gammi suahna ding hanciamtheihna, hamphatna nei napi in a lalote mite in (a kim leh pam a om midangte in) tua mipa bang cih muh ding hiam? A manphatna a theilo ganhing/ bang in amu theih na ding dan a om diam? Tua hilo in, Zomi ahihna a tan ding uh utlo ahih man in hamphatna a nawlkhin a tam zung zung diam? Zomi ka it man in, Zomi in ka si ding cih lungsim tawh gammisuahna a lalo tangial Zomi bang zah bang a om ding hiam?

Tua hi leh a tamzaw Zomite e leh?

“Zomi in ka piang, Zomi in ka si ding…” cih la bangtan vei I sa lai diam?

Zomi ihihna bang ciang hiam? Bang tan vei Zomi ihi lai diam?

Tg. Sianpu