Zomi a ding Khangthak Pilna

Zomi mun tuam gam tuam a om akuamah peuh in tuhun ciang in IT lam tawh muibun tak in midangte tawh liangko kikim in na kisem in, ki sin in, kizang ta hi. Hi mah ta leh hih bang khantohna pi sung ah a khe a ngap kha nailo le, a mun, a hun, a sum leh a van in ong pia nailo Zogam ah Zomi a tamzaw pek om lai hi. IT thu ih gen ciang in mong neilo in gen zawh loh ding zah, sin zawh loh ding zah in theihna leh van thak tampi khang to den ahih man in pawl khat in "hih bang khantohna pen ei a ding hi nai kei..." aci zong ki om thei ding hi. Tu hun in thudon kei leng nikhat ni mite ih delh hang ki phaw zo nawnlo ding hi. Hun in ong paisan ma in hanciam ni.

Tu laitak lian in IT lo tawh ki nungta thei in milak ah kihel thei hi hang. Hi mah ta leh tu zawh a sawt hetlo in IT lam ih theih kei a ih zat theih kei leh milak ah kihel zolo in, mite nuntak zia a eng ding leh mi khutnuai ah a ki omding ahi hi. Hih bang khantohna tawh Zomi bup ih khantoh theih na ding in bang ci kalsuan in bang sem masa ding cih na vei kha ngei hiam? Na lungngai kha ngei hiam? Mipi khantoh na ding in mimal a khang toh ding kisam masa hi. Zomi in IT lam pilna, siamna, ukna, kinna a neih ding ih deihsak leh ei mahmah pan kipan masa ding hi. IT huleh la tuamtuam sim in, zong in dong ding hi hang. Ei tek in ih hanciam ban ah kipawlna min tawh, a lom in, kigawm khawm in ih kipawl theih ding leh ih sep khop ding kisam hi.

Zomi khangthak te in IT lam ah siam in kipawlsiamna ih neih theih na ding in tu laitak a nu leh pate, tu laitak a makaite, mipi te in ih pantah ding kisam hi. Tawsawn na mun akisap na ah sawn in, mai kaih na mun akisap na pan kai thei in, lam pai khop, kalsuan khop a kulna mun ih ih kalsuan khop theih ding thupi hi. Ih zat na ding mun thei siam ni. Information and Communication Technology pen Zomite in zothawh tak in ih zat theih na ding in IT kipawlna ah ih hanciam ding le ih tha ih ih ngal, ih sum leh paai te tawh ma ih pan ding kisam hi. Zomi IT kipawlna in mipi a ding in bangka sem thei ding uh hiam cih lunggnai gige in ong hanciam ding a, mipi in zong Zomi te a dig in Zomi IT kipawlna tung tawn in bang ka sem thei ding hiam cih ih lungngaih den ding kisam hi. Kipawlna min tawh hi ta leh, mimal min tawh hi ta leh piak ding sang in ngah ding ih lamet zawk den leh cikmah ciang in ki khangto ngeilo ding hi. Tua ahih man in IT pen Zomite a ahih theih na ding in ih neih sun, ih theih sun, ih veina te gawm khawm in ma pang ciat ni ci in ZOCIA pan in kong zawn phapha nuam uh hi.