Lia leh Taang" tawh kisai Taang Sianpu' muhna leh a Zatzia

Tomkaihna:


A. Lia leh Taang pen buaipih ding hi hetlo in, Ciimnuai Zomi khempeuh in i zat tangtang ding thamlo in, Lai Zomi te in zong hong zatpih theih na ding, hong zatpih nop na ding in i han thot ding eima tavuan tek ahi hi. Amau hong zatpih ma un ei mahmah in i Genna tawh hilo in, i Sepna tawh i pat masak kul hi.
B. Lai Zomi te in ei Ciimnuai Zomi te tawh ki pumkhat, uniformity a deih uh leh Lia leh Taang hong zat pih uh leh hi ziau lel hi. Thu haksa hi peuhmah lo a, ei buai zong kul hetlo lel hi.
C. Salai leh Mai bel ei tawh kisai kha hetlo (hih context sung ah) ahih ma in kikup ding zong hilo hi kici thei hi. Hih laikhak a ngah teng lak ah zong Lai Zomi omlo ding ihih man (aki gawm or a sisan kigawm a om leh bel tua thu khat) in ei tawh akisai zaw deuh Lia leh Taang vai bek mah i kikup leh zong i kikup ding hi zaw kik bilbel hi.
D. Zomi te sung ah Lia leh Taang zat kul lualo zaw a, mi namdangte leh Zomi lote lak ah i om ciang in i Zomi hihna a kilang sak Lia leh Taang zat tangtang ding in hoih kasa hi.
E. Lia leh Taang pen Nungak leh Tangval cina leh zat ahih sam hang in, Nupi leh Papi a ding in i zang zong in sialua lawmlawm, hi theilo lua lawmlawm cih hituan samlo hi.
F. Lai Zomi te in hong zatppih ma un ei Ciimnuai Zomi vontawi teng in na zang photphot khawl leng cih hong hanthawn nuam ingh.


I. "LIA LEH TAANG" VAI KEIMA MUHNA LEH KA ZATZIA

1. Lia leh Taang vai pen buai ding hlo hi.
2. Lia leh Taang pen buai ding hilo ahih man in zatloh phamawh a i zat ziau ding hi ahi hi.
3. Salai leh Mai pen buaipih taklo ahih man in zat khak hetloh ding hi ziau lel mai hi.
4. Salai leh Mai pen ei tawh kisai vetlo lel ahih man in buaipih loh ding ahi lel hi.
5. Salai leh Mai pen kikup pih ding hilo a, i kikup nop leh Lia leh Taang vai bek i kikup ding hi zaw ding hi.
6. Ciimnuaimi teng in Lia leh Taang Zang khinlo napi uh in, Laimi khempeuh in Salai leh Mai tam zat mahmah uh hi.
7. Lai Zomi te in Lia leh Taang hong kuamah in hong zatpih lo napi uh in (kei theihna ciangciang ah), ei Ciimnuai Zomi te in Salai leh Mai a zat pih i om pen buai huai thu hi hetlo napi in angaihsut huai mahmah veve thu khat hong hi citciat se hi.
8. Salai leh Mai pen ui cithak i huat dan in huat ding hi khinlo napi in, a a zangte in a zatnop sesena uh a hang pen (the reason behind it or the politics behind it) a sittel huai mahmah leh kidop huai mahmah khat hi bilbel hi.

Note: Tan 10 laivuan result a suah ni ciang in kamin mai ah Taang DS Kap Sian ci-in a kawllai ngiat tawh hong suak linlen lel mawk hi. Ka tan 8 a kipan Taang pen ka zat toh suak hi a, sang sung ah ka zat paisuak hi. Taang kazat man in siatnapi a om tuan lam ka thei kha kei hi. Taang kazat man in buaina khat mahmah zong a om tuan kei lel hi. Sang kah laitak in ka Zomi itna lahna in Taang ka zat man in midang lah buai sak keng, kei lah buai keng zang ziau hithiat lel kahih man in Kawlgam 10 laivuan result natawm sung ah ka min mai ah Taang tawh hong suak linlen hi. Salai leh Mai bel theih pih keng, Zomi sung ah Tansaawm laivuan na result ah Taang tawh a suak pen tamlua zungzung in ka um nai kei hi.

Tu dong mah ta pa khat leh tanu khat ka neih dong mah Taang zang suak lai ingh. Leitung bei dong, ka nuntak sung teng in zat suak sawm lai ingh. Bang hang hiam cih leh Lai leh Taang tawh buailo lua lel kahih man hi.

Lia leh Taang tawh buai:
Hih mun ah buai icih sung ah nam (2) om hi. A zat sawm lua a a buai tawh, a zat sawm lo lua a a buai tawh... pauselo in a zang suak ziau tawh cih bang kiom hi. Koi zaw teel ding cih hi ziau sa ingh. Hih thute pen kikup zong kul hetlo a commong sense (commong knowledge) tawh Lia leh Taang automatic a zat ziau ding pawl ahi hi. Tu in a tampi kong gelh khak hang in a gen lam sang a sep lam a thupi sak zaw kahih man in nidang a kipan tuni dong a zang ziau kahi hi.

Tua ahih man in i Zomi itna lahna nam khat mah ahi Lia leh Taang zatna pen a gen bek tawh silo in, zat sawm pah lel ding hi. Tua icih ciang a kingam, akingam lo kua teng om cih bel a thutuam ci ni :) Lia leh Taang a zanglo peuhmah Zomi itlo hi bel ci tuan keng, ahih hang sumbeina lah hilo, thatang piak keei a hanciam lah kullse lo Zomi hihna lahna in midang in hong zatpih nuam kei zong in en zang leng ahi hi ziau lel hi. naci uh hia guai?


II. MINAM LEH GAM VAI THUPI TE MUN KHATKHAT TE AH "A TAMZAW DEIHNA HOIH KHIN THEILO IN, MANG DING HI THEI KHIN LO HI"


1. A tamzaw deih/ mee zawh zawh tawh minam vaihawm cih pen ahih theih khit lohna pawl khat om hi.
Gtn. Sente (Chinese) in Asia gambup or amau mipi tam mahmah uh ahih man in amau deihna (a tamzaw deihna) tawh hong uk cip le uh bang ici ding?
2. Kawlgam ah a tamzaw 80% val ding khong? bang Buddhist hi in, a tamzaw deihna tawh Kawlgam bup Buddhhist gam suak ding, a mi khempeuh zong Buddhist suak ding hong ci leng bang ici diam? Hong cici khin zong nahi gige ahih man in a tai khiakhia ihi zaw hi.
3. Kawlgam ah Kawl minamte a tamzaw ahih man in Zomi te laite sin theilo ding, Kawlpau, Kawlai bek sinthei ding ci-in a tamzaw amau teng i thukimna tawh hong simmawh, hong khaktan man in gampua akipuasuak ziahziah ana hi hi.
4. Joshua leh Caleb te zong 10 te' muhna leh deihna te tawh aki banglo a muh man un, a man leh a hoih ding a muh man un a mau silo in, a lawm 10 (a tam zaw muhna a khial teng) si in a khualzinna zom theilo uh hi.
5. Martin Luther, Church Father tuamtuam te zong a tamzaw muhna leh deihna a zuih loh man un tu in suakta tak in biakna a nei thei ihi hi.

Thu leh la khat peuhpeuh ah Vote ding, a Tamzaw deihna tawh sep ding pawlkhat om a, vai pawlkhat-te ah a tamzaw deihna a hoih khitlohna leh a hih theih khit lohna zong om hi.

Zomi sung ah a Tamzaw deihna hoih mahmah napi in, mailam saupi a ding in a Tamzaw deihna hoih khinlo thei hi. Bang hang hiam cih leh Zomi te lak ah a tamzaw pen ki pilkhin lo, a tamzaw in thu kimukhinlo zaw ahih man hi kha ding hi. Gam khangtonate, Democracy gamte ah bel mi khempeuh pilna kicing tek, sinna kicing tek leh thumuhna picing nei tek uh ahih man in a tamzaw deihna a thupi pen ahih loh phamawh hi. Ahih hang...


Kawlte lak ah, Zangkong khuapi sung khong, company leh NGO te lak khong ah Zomi akihel khate in Kawlmin a zat uh zong sialua lo a, Zomi min a zat ban ah, Lia leh Taang (kawllai mah in) hong zang lai hi le uh tu a sang in Zomi Khangthakte, Siamsin Khangthakte in Lia leh Taang pen ki tam zat zaw kha lai ding in ka um hi.

"Zomi sung ah Nupi khiin leh Papi khin te pawl khat natawm in Lia leh Taang a zang om lai mawk ahih leh, a bang hang a Tangval laite leh Nungaklai te in Lia leh Taang zang ngam lo zawzen ding ihiam? A bang, a kua lau huai mawk ding hiam" ici nuam phial hi.

Lei leh Taang vai pen ei Ciimnuai Zomi te lak ah kikup phing phing ding ahi nawn kei a, Lai Zomi te lak ah aki zelh theih na ding, hong zatpih nop na ding uh, a khiatna leh a hoihna i gengen ding hi zaw hi. Ei sung ah bel aki cimtak zong tampi mah kiom ta hi. Midang te kiang ah gen ding hi zaw ta hi. Ei bel ahi sa ci phot leng...


Khangthak Siamsin (siamsinlo te ahi zong in) Zomite in i mailam ah i gam leh minam hong makaihna vuah Zomi nam itna leh veina hong bulphuh masak ding uh deihsakna lianpi tawh,



Taang Sianpu

sianpu@zomi.net