Dictatorship vs. Direct Supervision

Dictatorship vs. Direct Supervision
(Tg. Sianpu)

Zomi sung ah a tamzaw in i theih khialh thu khat in “Dictatorship” cih leh “Democracy” kammalte ahi hi.

Kawlgam pen Democracy gam a hih himasak loh ban ah, Democracy tawh lampi hoih tak in ki ukkhakna nuai ah Zomi a tam zaw ki om khalo leh, i om zong in, ki telcian khinlo ahih man in eima theih sunsun ahi "Dictatorship" cih kammal te khong leh "Discrimination" cih ciang bek mah mikim in i lotngah hi.

Ithuakna lian leh, i tuah tam ahih man in na khempeuh i etna mit limlang pen eima thuak ngeina dan mah tawh ki tehkak in kimu ahi hi. (We see things as who we are, not really as what they are...) acih dan a hi hi. Mit limlang a bulhte in a muh thute ah a mitlimlang I tungtawn in a en, a mu uh ahi hi. Tua bang mah bang in leitung ah kua minam, kua gam hi ta leh amau background, amau ngeina, amau zia leh tong, amau tuahkhakthute (personal world view) ciat tawh thu a kimu ahi hi.

I thuakan tam in, I tuah tam ahih man in na khempeuh ah, a diakdiak ki makaihna leh ki makaihzia-te ah eima lotngah pen leh theih pen, tuah mun pen ahi “Discrimination, Dictatorship” cih te I lungsim ah hong phawng masa pen pah hi.

Khangluite in “Kaunei ki sungsia…” acih dank hat mah bang in kau nei khat pen mittang hah, a kampau tawh kithei veve hi. Ama hihna, ama background in a tawm, a tam (influence) nei veve hi.

Dictatorship cih leh democracy cih kammal pen ama hihna lian in a ki zat khak ngeilohna ah khangkhia, tua mun ah pilna siamna sin ihih man in a tawkheng tampi mah om lai hi. Gamdang I tun khit ciang zong tua I ngeina sa khat, I khanpih ngeinate, kiuknate, I zak zak kammalte pen I theihloh kikal in ki zongsang thei hi.

Ngeina leh tuah khak thu a ki bangle, gamdang, mundang I tun ciang leh kipawlna dang, minam dangte tawh I kithuah ciang in thu leh la khat peuhpeuh ah ki suang baih na lungsim a ki vomsa ahi hi. A diakdiak “discrimination, democracy, dictatorship…” tawh kisai kha thu leh late ah ki sensitive mahmah a, muhna pai khial baih, sawi tai baih mahmah hi.

A tatak in eima tuakkhakna a tam luat man leh, a tawkheng, a dapphah sah khinlua ahih man in company, NGO, kipawlna khat peuh ah na I sep tak ciang in issue tampite ah ong ki simmawh, ong ki nengniam, galkap ukna tawh ong ki uk cih bang in ki phun ciak thei hi. A tatak in nasepna khat peuhpeuh ah pen tua zong na hi khin khollo thei hi. Eima tuahkhakthute tawh I tehkak man zong hi thei hi. Sep leh bawlna khat peuh ah tungsiahte (boss te) in direct supervision, direction ong piakna khat peuh pen ong simmah hi, ong ukcip nuam hi cih muhkhialhna kinei baih mahmah hi. A diakdiak in nasepna pawl khat (fast moving space) te ah tu a dan ngaihsutna a nei kha tampi ki om thei hi. Eima thuakna sate tungtawn tawh etkak in ahi ding zah, ahi zah sang in a uang zaw leh, muhkhialhna ong lut baih mahmahna pen eima thanemna zong na hi thei hi. I nehno na pen kamapu siamlahna, nasep dan siam nailohna, mite’ nuntakzia leh gamdang, namdangte ki vaipuakzia telnailoh man zong nahi thei hi.

Nasepna khat peuh ah experience tam a nei nailo ahih kei leh nidang a sep ngei nailoh nasepna thak I neih ciang in I tungsiahte (boss te) in ong simmawh, ong nengniam hi cih muhna uang tuang tak in ong lut baih mahmah a, ahih hang tua pen I tungsiahte in direct supervision ong nei, I sep dan leh sep zia ong gen khong na hi zaw thei hi.